Alicia Keys, The Element of Freedom

D'Alicia Keys ass an der R'n'B Musek e bëssen de Géigemodell zu de blénkege Plastikprinzessinnen wéi Rihanna a Lady Gaga. D'Alicia Keys schreift a produzéiert seng Stécker selwer a bei senge Concerte sëtzt hatt diskret hannert dem Piano. Lo huet d'Alicia Keys säi 4. Studioalbum an 8 Jor virgeluecht.

Am Géigesaz zu de Virgänger fällt de Luef iwwert „The Element of Freedom“ allerdéngs méi verhalen aus. Dat war sou net ofgesinn: well vrun e puer Wochen réischt hat den Jay-Z hatt mat „Empire state of Mind“ an d'Hitparade katapultéiert.

Mat de 14 Stécker vun „The Element of Freedom“ beweegt sech d'Alicia Keys ewech vu sengen afroamerikanesche Soul-Wuerzelen. Dogéint ass als éischt mol näischt anzewennen, well schliisslech geléngen him e puer exzellent Poplidder.

D'Problemer leie bei de Balladen. Där ginn et um Album net nëmmen ze vill, mee vrun allem klénge si all d'selwecht. Do klimpert als éischt de Piano vru sech hin, da schwëllt d'Lidd dramatesch un, fir dann nees duuss ofzekléngen. Wéinstens gëtt op dee soss sou obligatoreschen Tounartwiessel verzicht.

Spéitstens an dëse Momenter weist sech, dass et kee Fehler vum itunes-Programm war, den Album net an de Genre R'n'B, mee an de Genre Easy Listening anzeklasséieren. Wou dëse Stilwiessel mol ende kéint, dofir gëtt et schonn éischt Unzeechen. D'Alicia Keys soll mat Disney e Kontrakt iwwer een Animatiounsfilm ofgeschloss hunn. Wann et him also tatsächlech drëm goe sollt, kitschege Pop fir en Comic-Blockbuster ze schreiwen, dann ass et mat sengem neien Album um richtege Wee. Et bleift allerdéngs d'Fro, ween sech dann nach ëm d'Rettung vum R'n'B këmmere soll.

Weider Artiklen